O presente curso ten como obxectivo formar a perfís técnicos na xestión, administración e resolución de incidencias en redes de comunicacións corporativas de alcance local.

Ao longo dos tres módulos que conforman a actual versión deste currículo, o alumnado adquirirá coñecementos no deseño, construción e mantemento de redes de computadores e a súa aplicación en contornas empresariais. Así mesmo resaltar, nesta versión recentemente actualizada do curso CCNA v7, a inclusión dos métodos de implementación de QoS, a implementación de políticas de seguridade e, no contexto de tecnoloxías punteiras en redes, o tratamento da virtualización de rede e a arquitectura e xestión das SDN - redes definidas por software, para a programación de redes e a automatización de tarefas.

A superación dos módulos que compoñen o curso prepara as aspirantes para facer fronte ao exame 200-301 CCNA v7, requirido para a obtención da credencial Cisco Certified Network Associate - Certificación CCNA.

Exame de certificación incluído: 200-301 CCNA - Cisco Certified Network Associate Exam. O manual e a certificación están dispoñibles en inglés.

A posibilidade de presentarse a exame por parte do alumnado estará suxeita á superación do curso co aproveitamento esixido polo CNTG e Cisco, ademais da obtención do correspondente voucher académico que o acredite.

Está especialmente recomendado para alumnado de grao medio e superior de FP do ámbito das telecomunicacións e de informática; para estudantes ou graduados de titulacións universitarias técnicas como informática, telecomunicacións, física, matemáticas ou enxeñería industrial; e tamén está altamente recomendado para traballadoras/es en activo que desexen mellorar o seu nivel de cualificación ou para aquelas que traballaron na área de redes e sistemas e non contan con acreditación.

O curso CCNA v7 non require coñecementos previos. Aínda así, recoméndanse competencias introdutorias na administración de redes e sistemas e coñecementos mínimos de inglés técnico para lograr un mellor aproveitamento e comprensión do curso.

As/Os docentes son instrutoras/es acreditadas/os polo programa Cisco Netacad e certificadas/os nas especialidades que imparten. Teñen máis de 6 anos de experiencia nesta área.