O novo Drupal CMS (xaneiro de 2025) ten como obxectivo principal facer que Drupal sexa máis accesible e fácil de usar para unha audiencia máis ampla, incluíndo creadores de contido, especialistas en márketing, xestores de sitios web e deseñadores.

Drupal CMS inclúe unha experiencia excepcional “out-of-the-box” que permite crear e estender sitios con facilidade, mesmo a usuarios sen experiencia previa en Drupal. Para iso conta cunha interface máis intuitiva e amigable e con amplo conxunto de funcións preconfiguradas que os creadores de sitios web poden utilizar facilmente. Todo iso mantendo a mesma potencia e flexibilidade característica de Drupal, pero cunha curva de aprendizaxe menos pronunciada.

Neste seminario exploraremos as funcionalidades incluídas de base neste novo Drupal CMS e veremos como ampliar o portal con módulos e “receitas” adicionais. Veremos tamén as diferenzas con Drupal Core, que seguirá sendo a versión recomendada para grandes proxectos de desenvolvemento. 

O relator será Fran Gil, experto en desenvolvemento web con Drupal desde o ano 2006 e formador e consultor Drupal en Forcontu desde 2009. Fran Gil é autor dos libros e plans formativos que impartiu Forcontu en Drupal desde a versión 6 á 10, e xa está a traballar nos cursos da versión 11. Tamén titoriza os cursos en liña de Forcontu e imparte os cursos presenciais e por videoconferencia para empresas.