Low-Code: a IA como copiloto para o desenvolvemento é unha sesión pensada para amosar como o desenvolvemento moderno está cambiando grazas á combinación de ferramentas low-code e capacidades avanzadas de intelixencia artificial. Se ata hai pouco crear unha aplicación requiría escribir cada liña de código a man, hoxe é posible xerar pantallas, prototipos funcionais e incluso lóxica de negocio en cuestión de minutos. Nesta sesión exploraremos que é —e que non é— o low-code/no-code, que achega realmente e por que a súa adopción está medrando tanto en equipos técnicos como non técnicos.

Veremos como a IA actúa como un auténtico copiloto durante o desenvolvemento: xeración de interfaces a partir de deseños en Figma, asistentes capaces de crear estruturas completas de aplicacións e builders visuais como FlutterFlow ou Bubble que permiten levantar solucións áxiles e robustas. Tamén analizaremos casos prácticos, boas prácticas e os límites reais do low-code: escalabilidade, mantemento, seguridade e dependencia das ferramentas.

O obxectivo é ofrecer unha visión clara e realista de como estas tecnoloxías poden acelerar o desenvolvemento, reducir carga operativa e abrir novas posibilidades para calquera equipo. Sairás con ideas, exemplos e seguintes pasos concretos para continuar aprendendo e aplicalo nos teus proxectos.
 

O relator será David Carvajal Garrido,  é consultor e formador tecnolóxico con máis de 15 anos de experiencia axudando a equipos de desenvolvemento a mellorar a súa produtividade, calidade e autonomía sen interromper a produción. É creador do método Formación Tecnolóxica Integrada, un enfoque baseado na aprendizaxe práctica directamente sobre a contorna real de traballo, o código e os proxectos activos dos equipos.

O seu traballo céntrase en acompañar a perfís técnicos na adopción eficaz de novas ferramentas e enfoques de desenvolvemento, como o low-code aplicado a arquitecturas reais ou o uso de intelixencia artificial como apoio ao desenvolvemento e ao testing, sempre desde unha perspectiva crítica e orientada a resultados. O seu enfoque pon o foco en entender que achega realmente cada tecnoloxía, como integrala sen perder control técnico e como evitar o uso superficial ou pouco sostible destas solucións.

Traballou como desarrollador full stack senior, consultor técnico e formador en empresas, ademais de ser Lead Instrutor en desenvolvemento web full stack  e profesor en másteres oficiais universitarios. Combina visión técnica, experiencia práctica e criterio pedagóxico, achegando aos equipos unha mellora directa e medible na súa forma de traballar.