FAQ: ASISTENCIA

 

É obrigatoria a asistencia ás actividades formativas?

O persoal admitido a unha actividade formativa de carácter presencial/virtual deberá acreditar  a súa asistencia polo menos no 85% das horas lectivas presenciais ou virtuais de dita actividade. No caso de que a actividade formativa conte con parte en modalidade de teleformación, deberá acreditar ter superado polo menos o 85% das tarefas incluidas en dita modalidade de dita actividade.

Para os efectos de garantir a presenza na actividade formativa do persoal admitido, o CNTG, poderá utilizar diversos métodos de control, como a sinatura de partes de asistencia, ou o rexistro de asistencia das plataformas virtuais nas que se desenvolva a actividade. A sinatura dunha lista de control no nome ou no lugar doutro/a alumno/a implica, para a persoa asinante, a súa automática exclusión do curso sen que se lle expida, en ningún caso, o certificado de asistencia, e a penalización de non poder inscribirse nin iniciar ningún outro curso no prazo dun ano a contar dende a data na que se determine a penalización.

Estes criterios non se aplicarán naquelas actividades que, pola súa propia natureza non requiran control de presenza, tales como conferencias e coloquios.

 

Existen posibles penalizacións aos alumnos?

O abandono do curso, a superación do máximo do 15% de ausencias nas modalidades presencial e virtual, ou a non superación de máis do 15% das tarefas na modalidade de teleformación, implicará:
  • A perda do dereito á obtención do diploma de asistencia e, de ser o caso, da opción de realizar o exame de certificación.
  • No caso de non existir causa debidamente xustificada, a penalización de non poder inscribirse nin iniciar ningún outro curso no prazo dun ano a contar dende a data na que se determine a penalización.
Terán a consideración de causas xustificadas as que a seguir se relacionan:
  • O cambio de situación laboral, pasando de desempregada/o a ocupada/o, que se deberá xustificar co contrato laboral onde figure a data de inicio de nova relación laboral.
  • O cambio de horario laboral, que se deberá xustificar con comunicación escrita, selada e datada emitida pola empresa, e que deberá ser trasladada ao CNTG na mesma data na que a empresa llo comunica ao traballador.
  • Situacións de forza maior debidamente acreditadas que segundo o establecido no artigo 1105 do Código Civil, que esixe que a situación sea IMPREVISIBLE e INEVITABLE, que se deberá xustificar con documentación que acredite a causa e as circunstancias de IMPREVISIBILIDADE e INEVITABILIDADE.
A renuncia ou abandono do curso unha vez publicada a listaxe definitiva de admitidos implicará:
  • Na data de comezo do curso ou posterior, a penalización de non poder inscribirse nin iniciar ningún outro curso no prazo dun ano a contar dende a data na que se determine a penalización.
  • De xeito previo a data de comezo do curso, nun curso con alumnado en reserva, no que NON se poda cubrir a praza renunciada, a penalización de non poder inscribirse nin iniciar ningún outro curso no prazo dun ano a contar dende a data na que se determine a penalización.
  • De xeito previo a data de comezo do curso, nun curso con alumnado en reserva, no que SI se poda cubrir a praza renunciada, suporá a renuncia a cursar o curso e aos dereitos que elo conleva, sen penalización adicional.
  • De xeito previo a data de comezo do curso, nun curso sen alumnado en reserva, suporá a renuncia a cursar o curso e aos dereitos que elo conleva, sen penalización adicional.
A non realización ou non superación do módulo de igualdade suporá a penalización de non poder inscribirse nin iniciar ningún outro curso no prazo dun ano a contar dende a data na que se determine a penalización.
 
O incumprimento do deber de comunicar calquer cambio que afecte ás circunstancias que deron lugar ao recoñecemento das bolsas e axudas, o non asinar e entregar ao comezo do curso a declaración que permite constatar cal é a situación laboral do alumno/a ao comezo do curso e que esta lle permite participar no curso, ou o incumprimento das normas de respeto  a compañeiras e compañeiros, profesorado e persoal do centro, poderá implicar a expulsión da formación e a penalización de non poder inscribirse nin iniciar ningún outro curso no prazo dun ano a contar dende a data na que se determine a penalización.

 

Que documentación se entrega aos asistentes aos cursos?

En todos os cursos a impartir no CNTG os alumnos recibirán diverso material e documentación relacionada coa materia a tratar que poderá ser en soporte dixital ou de papel. Por tratarse de documentación oficial do fabricante que imparte a formación ou polo carácter novidoso dos contidos a desenvolver, esta documentación poderá estar redactada en inglés en determinadas accións formativas.